عيني من الزغر دمعي نغمهــه
وروحي مابعد يطرب نغمهـــــه
الدنيا خلاف عشرتكم نغمهـــــه
مثل موته نتمشه على الوطيــه
------------------
احبابي شلون حالتكم بعدنـــــه
شبدينا والزمن عنكم بعدنـــــــه
اذا أنتم نسيتونا احنا بعدنــــــه
نذكركم كل صباح وكل مسيـــه
--------------------
علامك ما ترمش علي تنشـــــد
كثيره ابتوت لك بالروح تنشــد
بيه جروح تالي الليل تنشـــــد
قوافي اهواك حيل اثرت بيـــه
--------------------
أنا جناح الحزن رفرف منسماي
يموت الموت لو يشرب منسماي
أظن تختاض لوتعرف منسماي
وخاف عليك لا تنصدم بيــــــــه
--------------------
تمرضت وصعد مرضي علـــى اشفـــــــــــــــــــــــــــــــاي
وطب لندن فلا يلحك علــــــى شفــــــــــــــــــــــــــــــــاي
حبيبي من تحط شفتك علـــى شفــــــــــــــــــــــــــــــــاي
اشفه وكل مرض ما يبقه بيـــه
--------------------
حبيبي لا تشد راسك سلامــــات
اجاني خبر عن صحتك سلامـات
الف مكتوب اوديلك سلامـــــات
مشافى والمرض يندار اليـــــه
--------------------
على كيفك حبيبي ويــــــــاك برضـــــــــــــــــــــــــــــــاك
وعشرتي وياك موش بجبــــر
برضـــــــــــــــــــــــــــــــاك
زرعت ارضك ورد خضر شـوج برضـــــــــــــــــــــــــــــــاك
عمن ساسك رمل وأرضــــــك موليـــــــــــــــــــــــــــــــــه
--------------------
أحبن كل حلو بيكم ومركــــــم
وعلى راسي مطالبكم ومركــم
راح ازحف على اركبي ومركـم
وظل وفاي لأخر نفس بيــــــه
--------------------
نحيل الجسم من بعدك ترانــي
وأريدك يوم بعيونك ترانـــــي
أفكرك بيك كل ساعه ترانـــي
أفكر والبعد يصعب عليـــــــــه
--------------------
جروحي تعرف طعناته وعدهن
سجل ماحاجه اجمعهن وعدهـن
انه متاني لمن يوصل وعدهــن
وحط طينته بخده العال بيـــــه
--------------------
تحب بيه طبـــــــع لاذم ولاداس
وجذمي مامشت شينـــه ولاداس
لهذا ماربح حظـــــــي ولاداس
وصفه حتى الربح خسران اليـه
--------------------
يصاحب طال هجرك مر علينــه
وحتى الزاد بعدك مر علينـــــه
اذا بعدك تحبنه مر علينــــــــــه
تعال وشوف حالي شصار بيه
--------------------
قضية اسمك على اسمــــــــك ماشي خطنــــــــــــــــــــــــه
ازدحام احنه عله دربك ماشــي خطنـــــــــــــــــــــــــــــــــه
تظن من حلاتك ماشخطنــــــــه
نشوفك ننشخط ميه بالميـــــــه
--------------------
مريض ولا جنح عندي ومركـــم
وطحت مابين أمر الله وأمركــم
ويمته من المرض اخلـــــــص وأمركــــــــــــــــــــــــــــــم
وعتابي علي الصديج المامــر عليــــــــــــــــــــــــــــــــــه
--------------------
حلاوه وطيب للياكل من تمرنـه
يظل نافذ كلامك من تمرنــــــه
تميل البصره كلهه من تمرنــــه
والك شط العرب ياخذ تحيـــــه
--------------------
سهام الولع صابني وفاتــــــن
لأن ولفي الأحبه اسمر وفاتــن
يلهجرك سبب بروحي وفاتيـن
السمع والشوف موتهن سويـــه
--------------------
الحلو شمابي حلا لابد ويامــــر
وحبيب الروح يدلل ويامـــــــر
اصيرن نار من يبعد ويمــــــــر
ورد قالب ثلج لورد أليـــــــــه
--------------------
اليضدك عانه مايسوه ودرهـــم
وسمحهم أكرهه واكره ودرهم
ادر كلنوك ألك فرحي ودرهــم
عله كل واحد يريدنه الأذيـــــــه
--------------------
بورق حبنه أنكتب أسمـــــــــك ويسمـــــــــــــــــــــــــــــاي
ودليلي أيموت من بعــــــــدك ويسمـــــــــــــــــــــــــــــاي
تره العطشان بلهيمه ويسمـاي
فرحته وفرحتي بشوفك سويـه
--------------------
غريبه الروح وين انتم يهلهــــه
لفاهه الظيم وي ساعة يهلهـــه
أخوي ودمعته بنومه يهلهـــــــه
لأن طاف بحلم بي خير إليــــه
--------------------
وحك حيدر ولينه ألدر فتاهــــه
هجركم كل كحل روحــــــي فتاهــــــــــــــــــــــــــــــــه
فتوتك هاي ياهو اللي فتاهــه
محبتك ليش تتحرم عليــــــــه
--------------------
ونعم ياروح مامره دنيتـــــــي
ومحبه وطيب للوادم دنيتــــــي
شسوي وهاي يبنادم دنيتـــــي
زرعت الزين خضر شين اليـــه
--------------------
يخصني المصايب موش يعمــن
وابجي ولا أخاف عيون يعمــن
عرف حالي الحبيب وصاح يع مــــــــــــــــــــــــــــــــــــن
فلك طرني ومصابك من أديــــه
ياحبي طال هجرك مرعلينــــه
وحتى الزاد بعدك مرعلينـــــــه
إذا بعدك تحبنه مرعلينـــــــــــه
نشوفك كل صباح وكل مسيـــه